«Փրկի՛ր մեկ կյանք»

1000 մարդ համաձայնել է որպես դոնոր «Ոսկրածուծի դոնորների հայկական ռեեստրին» անդամակցելու Աշխարհում յուրաքանչյուր օր 600 մարդ սպասում է այն դոնորին, ով սիրահոժար հանձն կառնի ոսկրածուծի փոխպատվաստման ճանապարհով փրկել իր կյանքը...

Սա միջազգային վիճակագրություն է, որով մտահոգված է նաեւ մեր երկիրը։ «Ոսկրածուծի դոնորների հայկական ռեեստր» բարեգործական հիմնադրամը Երեւանի Սիրահարների այգում նախաձեռնել էր «Փրկի՛ր մեկ կյանք» խորագրով միջոցառումը՝ բարեգործական բացօթյա համերգը, որի նպատակն էր հիմնադրամի առաքելության տասնամյա արգասավոր գործունեության մասին հասարակության առավել լայն շերտերին տեղեկացնելը։ Միջոցառումը տվել է իր պտուղները, եւ արդյունքում 1000 մարդ համաձայնել է որպես դոնոր «Ոսկրածուծի դոնորների հայկական ռեեստրին» անդամակցելու»։

«Միացյալ Նահանգներում ցողունային բջիջների փոխպատվաստումն արժե կես միլիոն ԱՄՆ դոլար, եվրոպական երկրներում՝ 150000 եվրո, Ռուսաստանում՝ 70000 դոլար, Իրանում՝ 60000 դոլար։ Ընդ որում, եթե ոսկրածուծի մեր դոնորական արյունը տրամադրում ենք որեւէ երկրի հայազգի կամ այլազգի քաղաքացու, միեւնույն է, փոխպատվաստման մասին վերջնական որոշում կայացնողը մենք չենք, քանի որ պրոցեսը բժշկական առումով բավականին բարդ ու պատասխանատու է։ Բայց, իհարկե, մշտապես շատ ուրախալի է, երբ լսում ենք, երբ արյունն արդեն համընկել է այս կամ այն դոնորին եւ կարողացել ենք փրկել եւս մեկ մարդկային կյանք»,–մանրամասնեց ռեեստրի բժշկական տնօրեն Միհրան Նազարեթյանը, մամուլի ասուլիսում։

10 տարիների ընթացքում շուրջ 15000 դոնորներ կամավորական սկզբունքներով հավատարմագրվել են ռեեստրում, դոնորների գերակշիռ մասը հայ տղամարդիկ են։ Նշվածներից ցողունային բջիջներ են վերցվել 700 դոնորներից, ովքեր օգնել են աշխարհի տարբեր երկրներում ապրող մարդկանց՝ ազատվել մահվան ճիրաններից։ Այս՝ բժշկական տեսանկյունից բարդ գործընթացը մշտական ինֆորմացիոն աջակցություն է պահանջում։ Ըստ կազմակերպության նախագահ Ֆրիդա Ջորանի՝ շատ կարեւոր է մարդկանց իրազեկել, որ դոնորական արյուն հանձնելը ոչ մի վտանգ չի ներկայացնում մարդու առողջության համար՝ մարդասիրական մեծ քայլ լինելով։

«Շատ կարեւոր է, որ արյուն հանձնող հիվանդը չունենա ՄԻԱՎ ՁԻԱՀ, HLH, մալարիա եւ սուր վարակիչ այլ հիվանդություններ։ Իբրեւ ավանդույթ, դոնորը եւ հիվանդը միմյանց ազգային պատկանելության եւ այլ տվյալներ պետք է չունենան, բացառությամբ այն դեպքերի, երբ բուժվածն ուզում է իմանալ, թե ո՞վ է եղել իր կյանքը փրկողը եւ ցանկանում է իր երախտագիտության խոսքը հայտնել»,–տեղեկացրեց «Ոսկրածուծի դոնորների հայկական ռեեստրի» գործադիր տնօրեն Սեւակ Ավագյանը։

Հարցեր, պատասխաններ, մեկնաբանություններ